ლევან ხარანაულმა 1986 წელს დაამთავრა თბილისის სახელმწიფო სამხატვრო აკადემია. 1983 წლიდან მხატვარი მონაწილეობს სხვადასხვა ჯგუფურ გამოფენაში. მისი პერსონალური გამოფენები სხვადასხვა დროს იმართებოდა როგორც საქართველოში, ისე საზღვარგარეთ: თიანეთის მხარეთმცოდნეობის მუზეუმში, შალვა ამირანაშვილის სახელობის ხელოვნების მუზეუმში, გიორგი ლეონიძის სახელობის ქართული ლიტერატურის სახელმწიფო მუზეუმში, თბილისის გალერეებში — „TMS“ და „ძველი გალერეა“, ასევე ნანტში, პარიზსა და ბოლონიაში.

ლევან ხარანაული წიგნებსაც აფორმებს. მას ეკუთვნის ილუსტრაციები მამის, ბესიკ ხარანაულის პოეტური კრებულებისთვის, მარიამ ხუცურაულის „სანათას წიგნისთვის“ და ცნობილი ქართველი კინორეჟისორისა და მწერლის, გოდერძი ჩოხელის ლექსების კრებულისთვის — „ბინდისფერი ხეობიდან ცამდე“.

1988 წელს ლევან ხარანაულმა მთავარი როლი შეასრულა ამავე რეჟისორის ფილმში „აღდგომის ბატკანი“.

ლევან ხარანაულის ნამუშევრების უმეტესობა დაცულია კერძო კოლექციებში საქართველოში, იტალიაში, გერმანიაში, საფრანგეთში, ესპანეთსა და ლუქსემბურგში.

ხარანაულის ფერწერის მთავარი თემებია პორტრეტები, ნატურმორტები და მშობლიური დაბა თიანეთის პეიზაჟები. მისი მოდელები, ძირითადად, ოჯახის წევრები და მეგობრები არიან. ისეთი მარტივი საგნებით, როგორიცაა ჩაის ჭიქები თუ ბავშვის ფეხსაცმელი, ის საკუთარი ოჯახის ყოველდღიური გარემოსა და ოჯახური ისტორიის სიმბოლოებს ქმნის.

ის ცხოვრობს და მოღვაწეობს თიანეთში.